Parlamentera DEM Partiyê Newroz Uysal Aslan di çalakiya “Deng bide azadiyê” de axivî. Aslan, diyar kir ku girtiyên siyasî li dijî binpêkirinên mafan têkoşîna rûmetê dimeşînin û got: “Ji Îmraliyê heta Bakirkoyê heta hemû girtiyên siyasî azad dibin dê têkoşîna me bidome. Eynika kesên demokrasiyê dixwazin jî girtîgeh û Îmrali ye.”
Komeleya Ekolojiyê li Amedê 6’emîn Bazara Pevguhertinê ava kir. Aktîvîsta ekolojiyê Elîda Zerrî got ku armanca wan ew e ku li dijî çanda mezaxtinê, çanda parvekirinê pêş bixin.
Xwendekara zanîngehê Rojîn Kabaîş di şeva 27’ê îlonê de li Wanê winda bû û xebatên lêgerînê yên ji bo dîtina Kabaîş berdewam in.
Piştî biryara qedexeyê ya Walîtiya Amedê, li gundê Eskarê yê Pasûrê operasyona leşkerî hate destpêkirin. Qada daristanê tê bombebarankirin û ketin û derketina gund li welatiyan hate qedexekirin.
Rêveberiya Xweser a Demokratîk ji bo welatiyên ji ber êrişên Îsraîlê yên li dijî Lubnanê koçî herêmê bûn bi awayeke ewle bên bicihkirin, maseya krîzê ava kir.
Rejîma Îranê bi hinceta protestokirina cezayê îdamê 3 meh cezayê qedexeya hevdîtinê da Anîşa Eshadullahî.
Li gorî daneyên hikûmeta Sûriyeyê, ji ber êrişên Îsraîlê 22 hezar û 215 lubnanî û 65 hezar penaberên sûriyeyî derbasî Sûriyeyê bûn.
Walîtiya Amedê ketin û derketina çoltarê gundê Eskarê û mezrayên Simetax, Guhermî û Nedrehuşê yên Pasûrê ji bo 15 rojan qedexe kir.
Doza tacîza zayendî û tecawizê ya li Wargeha Xwendekarên Zilam a Sugozuyê ya Taybet a Cemaeta Suleymaniyan bi dosyaya “ezyeta li zarok hatiye kirin” re kirin yek dosya.
Înîsiyatîfa Ji Nagihan Akarsel re Edaletê diyar kir ku tevî gelek delîl û îtîrafan ku rojnameger û akademîsyen Nagihan Akarsel bi organîzeya rayedarên Tirkiyeyê hatiye kuştin jî tenê tetîkkêş Îsmaîl Rasîm Rifat Peker hatiye cezakirin. Înîsiyatîfê xwest ku kesên cînayet teşwîq kirin jî bên darizandin.
Li Edeneyê bi hinceta tevlibûna çalakiyên protestokirina xespkirina îradeyê ya li Wanê derheqê 10 zarokan de doz hatibû vekirin û niha li 2 zarokên din bi heman hincetê doz hate vekirin.
Ceylan Onkol li ser gora xwe hat bibîranîn. Parlamenter Bêrîtan Guneş di bîranînê de got: “Zîhniyeta ku Ceylanê kuşt û zîhniyeta ku 19 rojan Narînê nedît heman zîhniyet e.”
Di çalakiyên ji bo girtiyên nexweş hatin lidarxistin de ji bo Zeredeşt Odûncû û Ozge Ozbek ên rewşa wan a tenduristiyê her ku diçe xerab dibe banga “berdana lezgîn” hate kirin.
Hevserokê ÎHD’a Enqereyê Omer Farûk Yazmaci di daxuyaniya ji bo meha 153’yemîn a Komkujiya Roboskî de axivî û got: “Civak bi şer nayê rêvebirin. Heta ku edalet neyê Roboskî dê edalet neyê Tirkiyeyê jî.”