Di îdianameya der barê Hevserokê MED-DER'ê yê berê Rifat Ronî de hat amadekirin de, daxwaza hevpeyvînê ya televîzyona K24'ê ya Serwezîrê Herêma Kurdistana Federe Mesrûr Barzanî wekî "hevdîtina nûçeyê ya li gor armancên rêxistinê" hat wesifandin û hat xwestin ku Ronî bi "endamtiya rêxistinê" bê cezakirin.
Parêzer Fûat Coşacak bal kişand ser biryara binpêkirina "mavê hêviyê" ya DMME'yê ya der barê Rêberê PKK'ê Abdullah Ocalan de û got ku sererastkirina qanûnî ya ku ji Tirkiyeyê hatiye xwestin 10 sal in nehatiye kirin. Coşacak got: "Divê mafê hêviyê nebe qurbana siyasetê."
Endamê CPT'yê Kameran Osman, ragihand ku Tirkiye rêzeçiyayên Garê yên li sînorê Dihokê bi awayekî dijwar bombebaran kiriye.
Bi sedan kes li Dêrik û Amûdê li dijî êrişên dewleta tirk ên li ser Bakur û Rojhilatê Sûriyeyê meşiyan. Di çalakiyan de banga têkoşîna hevpar a li dijî êrişan hate kirin.
Nûnertiya Rêveberiya Xweseriya Demokratîk a Bakur û Rojhilatê Sûriyeyê û Eniya Piştgiriya bi Rojavayê Kurdistanê re bang kirin ku qada hewayî ya Rojava ji balafirên şer re bê girtin.
Di encama têkoşîna edaletê ya Emîne Şenyaşar de kurê wê Fadil Şenyaşar hate berdan. Bi berdana Şenyaşar re silha malbatên Şenyaşar û Yildiz hate kirin.
HesabÊn Youtube û Facebookê yên hunermend Rotînda ji ber giliyên hatin kirin, hatin girtin.
DEM Partiyê li Rihayê silha du malbatan kir ku di navbera wan de neyartî hebû.
Rêveberiya Xweseriya Demokratîk a Bakur û Rojhilatê Sûriyeyê bertek nîşanî êrişên dewleta tirk da û got ku dê li dijî êrişan destkeftiyên gel biparêzin. Rêveberiya Xweser, got: “Dewleta tirk di 4 rojan de hezar û 31 caran êriş kir, 17 kes hatin qetilkirin û 65 kes jî birîndar bûn.”
Di encama êrişên dewleta tirk ên li dijî Bakur û Rojhilatê Sûriyeyê de heta niha zêdetirî 30 navend ji xizmetê derketine.
Hevseroka Giştî ya SYKP’ê Feray Mertoglû bertek nîşanî êrişên dewleta tirk ên li dijî Bakur û Rojhilatê Sûriyeyê da û wiha got: “Li rexekî dibêjin aştî li rexa din jî sivîlan qetil dikin û nexweşxaneyan bombebaran dikin. Pêvajoyeke durû tê meşandin. Divê her kes dengê xwe derxîne.”
Ji Komîsyona Rapirsîna Cînayeta Narîn Guran a Baroya Amedê parêzer Mehdî Ozdemîr diyar kir ku îdianame awayê qewimîna bûyerê, piştperdeya wê û ji tespîtkirina faîl dûr e û got ku ji bo tespîtkirina faîlên rast dê dozê bişopînin.
Elîf Gemîcîoglûyê diyar kir ku rewşa bavê wê Abdurrahman Gemîcioglû yê ku tevî nexweşiya xwe ya giran di girtîgehê de ye di asteke krîtîk de ye û got: “Divê ATK demildest raporê amade bike. Ez difikirim ku ATK'ê bi zanebûnî raporê bi derengî xistiye."
Parêzera ÇHD'î Meral Hanbayat ku di nava rêxistinên hiqûqî yên serî li Konseya Ewropayê dan cih girt, diyar kir ku divê Tirkiye ji bo "mafê hêviyê" yê Abdullah Ocalan demildest sererastkirinên hiqûqî bike.