Şaxa ÎHD’a Amedê rapora têkildarî binpêkirinên 9 salan eşkere kir. Li gorî raporê; mudaxileyî 361 xwepêşandanan hate kirin, 570 hatin qedexekirin û herî kêm 27 hezar kes hatin binçavkirin.
Hate diyarkirin ku li Dibistana Nergîzê ya li Taxa Azadî ya navçeya Şeqlawê di navbera pêşmergeyên PDK’î de şer derketiye û dengê guleyan hatiye bihîstin.
Li çoltarê Hewlêrê li dijî DAIŞ’ê operasyon hate kirin û di operasyonê de endamê asayîşê Muhammed Jalayî jiyana xwe ji dest da.
Şeş sal û 3 meh cezayê hefsê dan Hevserokê Komeleya Lêkolînên Kurdî yê berê Eyyup Subaşi.
Ji ber gotina “Qirkirina Ermenan” derbarê rêveberên Baroya Amedê yên berê de doz hatibû vekirin. Der barê rêveberan de di danişîna ewil a dozê de biryara beraetê hate dayîn.
Zanyarê siyasetê Fûat Keyman ji ber nexweşiya penceşêrê jiyana xwe ji dest da.
Hevserokê DEM Partiyê yê Bajarokê Tilqebînê Lezgîn Kosen ê leşker û polîsan di çalakiya endamên Meclisa Dayikên Aştiyê de parsûyên wî şikandibûn wiha got: “Em ê li dijî êrişan têkoşîna xwe mezintir bikin.”
Parlamenterê DEM Partiyê Ferît Şenyaşar biryara tehliyeyê nirxand û got: “Hêj edalet pêk nehatiye. Nobet xelas bibe jî dê têkoşîna me ya hiqûqî bidome.”
Di doza êrişa li dijî Malbata Şenyaşar de derbarê hemû girtiyan de biryara tehliyeyê hate dayîn.
Ensîtûya Xebatên Civakî lêkolîna qadê ya “Meylên Civakî” parve kir. Li gorî lêkolînê, Diyanet û partiyên siyasî “du saziyên herî jênebawer ên Tirkiyeyê” hatin diyarkirin.
Malbat û wasiyê Reberê PKK’ê Abdullah Ocalan, ji bo hevdîtinê serî li Serdozgeriya Komarê ya Bursayê û Midûriyeta Girtîgeha Îmraliyê dan.
Ji ber parvekirina “Bijî berxwedana Kobanê” ku wêneyê YPG’iyan li ser bû, 3 dozên cuda li rojnamegerê girtî Mûrat Verîm hatin vekirin û 3 meh cezayê hefsê lê hate birîn. 2’yemîn Dadgeha Cezayên Giran a Yozgatê diyar kir ku dema ceza dayin Verîm, cezayên dadagehên din hatine hesabkirin.
Dîroknas-nivîskar Erdogan Aydin rageşiya li Rojhilata Navîn nirxand û got: “Tenê kurd têkildarî pêşeroja herêmê pêşniyara çareseriyê dikin. Çareseriya pirsgirêka li Rojhilata Navîn, konfederalîzm e.”
Lijneya Çavdêrî û Îdareyê ya Girtîgeha Tîpa T a Aksarayê tevî biryara dadgeha înfazê jî berdana Tamer Tankikûlû yê 30 sal in girtî ye 6 mehan dirêj kir.
Li Herêma Kurdistanê dengdana taybet ya ji bo hilbijartinên parlamentoyê dest pê kir.