Hejmara 10’emîn a Kovara Zrîngê derket û gihîşt xwînerên xwe. Kovara qerfî Zrîng, di berga xwe de balê dikişîne ser sala nû. Kaloyê ku sersalê pîroz dike, ji ber xizaniya li Kurdistnê xemgîn dibe û cilên xwe diyarî dike.
Li Geverê xebatên çand û hunerî ji holê hatine rakirin. Ji ber vê yekê ciwanên bi kuçe û kolanan daketin komek muzîkê ya bi navê Koma Dengda saz kirin û li ber stranên kurdî kolanan şên dikin.
Bi giştînameya Wezareta Karê Hundir, girtina eywanên sînemayê heta 1’ê Adara 2021’an hat dirêjkirin.
Hunermendên ji Dêrsimê bertek nîşanî veguherandina baregeha leşkerî ya ku Komkujiya Dêrsimê lê hatibû birêvebirin kirin muze dan û gotin travmayek nû li bîra civakê hatiye zêdekirin.
Diyarname.com di nava 20 endamên jurî de pêşbaziyek balkêş birêve bir û klîba kurdî ya salê da dengdayînê. Klîba sala 2020'an a Hunergeha Welat "Nazê Nêrgiza Hewşê" wek klîba yekemîn a salê hat hilbijartin.
Komeleya Lêkolînên Kurdî, vîdeoyên dersên kurdî li ser Youtubeyê bar dike. Mamsoteyê komeleyê Alî Arslan, anî ziman ku bi vî awayî hem dixwazin xwendin û nivîsandina bi kurdî hîn bikin hem jî rêzimana kurdî û armanca wan, pêşî li ber bişaftinê bigirin.
Di ser mirina nivîskar û rojnamevan Mahmût Baksî re 20 sal derbas bûn. Nivîskar Firat Cewerî, bal kişand ji bo wêjeya Baksî got: "Ew, ji bo nifşên nû mîak bû, hêvî bû."
11’emîn Mihrîcana Fîlmên Kurd a Hambûrgê, ji ber pandemiyê wê îsal di navbera 19-23’ê kanûnê de li ser înternetê bi awayekî online bê lidarxistin.
Bi ser wefata dengbêjê navder Mihemed Arif Cizîrî re 34 sal derbas bûn. Lê hîna jî bi qasî ku klam û çîroka jiyana Mihemed Arif Cizîrî tenetiya wî jî, her dem weke birînek biêş di singa hûnera kurdî de zindiye.
Karîkaturên ku 50 girtiyî derbarê şewba Covîd-19'ê de xêz kirin, bi navê "Korona Gunlerînde Mahpûslûk" hatin çapkirin.
Cabbar Alp piştî salên dûr û dirêj ên li bajaran, biryar da ku vegere gundê xwe. Alp, piştî salan vegeriya gundê xwe yê girêdayî navçeya Farqînê. Alp anî ziman ku divê mirov pêwendiyê bi civaka xwe re deyne.
Lîstikvanê Şanoya Bajêr a Amedê Yavûz Akkûzû diyar kir ku bi bernameya ‘Hinek Henek’ dixwazin çanda kurdî ya wekî xezineyekê ye derxînin holê û got: “Em bi lîstikan kena xwe bi desthilatdaran tînin.”
Medreseya Feqîyê Teyran a dîrokî ku li gundê Keraşînê navçeya Basa ye, ji ber xemsarriya dewletê û mirovên li herêmê hilweşiyaye û tenê dîwarên wê mane.
Kardeş Turkuler ji bo bîranîna Serokê Baroya Amedê Tahir Elçî yê 5 sal berê li Sûrê hat qetilkirin, strana “Hewar” li ser medya înternetê parve kir.
Mamosteyê îxrackirî Ramazan Kavak, di pirtûka xwe ya sêyem a bi navê “Rêwiyê Demên Windayî” de behsa çand, êş û berxwedana herêma Torê dike.