Nobeta li Xelfetî ya Rihayê li dijî tayînkirina qeyûm hatiye destpêkirin di roja 18’an de didome. Endamên Meclisa Şaredariyê yên DEM Partiyî xwestin derbasî şaredariyê bibin lê dîsa hatin astengkirin. Parlamenterê DEM Partiyê yê Rihayê Ferît Şenyaşar, Hevşaredarên Xelfetiyê Mehmet Karayilan û Saniye Bayram, endamên meclisê û gelek kesan xwestin derbasî şaredariyê bibin lê pêşiya wan bi bariyeran hate girtin. Amirê polîsan got ku biryareke astengkirina endamên meclisê tune ye û got ku dikarin serlêdana sûc were kirin. Her wiha amirê polîsan got ku têkildarî mijarê tu rayedar tune ne û peywira wan ew e ku qeyûm ji gel biparêzin. Partiyiyan jî bi gotina; “Em ê giliyê kê li kê bikin. Hûn kê ji kê diparêzin?” bertek nîşan dan.

 

‘SEPANA KEYFÎ’

 

Hevşaredar Mehmet Karayilan got ku sepaneke keyfî di meriyetê de ye û wiha pê de çû: “Hûn jî dizanin ku tişta hûn dikin bêhiqûqtî ye. Hûn li gorî qanûnan tevnagerin. Dibêje, herin gilî bikin. Ji ber ku hûn jî dizanin bêhiqûqtî ye. Ev hiqûq dê sibe bo we jî lazim bibe. Ne tenê îradeya gel hatiye xespkirin, ev dagirkerî ye. Em vê dagirkeriyê qebûl nakin. Ne tenê gel, xebatkarên şaredariyê jî nikarin biçin cem qeyûm. Heta ji memûrên xwe jî ditirsin. Bi bariyeran gel asteng dikin. Mifetîş, zîhniyeta qeyûm lêkolîn nakin. Me tenê dengê xwe li dijî neheqiyê bilind kir. Li kêleka gel me serî li dijî rejîma xedar rakir. Em bi gel re bûn lewma qeyûm tayîn kirin. Em bi hilbijartinê hatin û dê bi qeyûm neçin. Ditirsin ku nelirêtiyan wan derkevin holê. Hûn ditirsin, hûn ditirsin.” 

 

‘HERE LI KARÊ XWE BINÊRE’ 

 

Karayilan, bi domdarî wiha got: “Em zarokên ji heman taxê ne. Diyar e bê ka em ji ku ne. Ez ji Aramliyê me, Şaredar Saniye ji Karataşê ye. Hemû endamên me yên meclisê ji Xelfetiyê ne. Qeyûm, tu ji ku yî? Tu hewl didî Xelfetiyê birêve bibî. Here karê xwe. Heke hindik wijdan bi te re hebûya dê te ev zilm qebûl nekira lê bi te re wijdan tune ye.” 

 

‘EV DAGIRKERÎ YE’

 

Hevşaredar Saniye Bayram jî wiha bertek nîşan da: “Ya ku hûn dikin sûc e. Hûn nahêlin em xizmetê ji gel re bikin. Em mecbûr in biryarekê bidin. Em ê her roj bên şaredariya xwe. Her tişt firotin û dora malên me hatiye. Dê malên me jî bifiroşin. Bila kesek vê qebûl neke. Şaredarî li pişt bariyeran nayê birêvebrin. Em bi hilbijartinê hatin û me neheqî li kesekî nekir. Heke careke din hilbijartin çêbibe em ê dîsa bi ser kevin. Ev dadgirkerî ye. Em dagirkeriyê qebûl nakin. Divê gelê me xwedî li her tiştekî xwe derkeve.” 

 

ÇALAKIYA RÛNIŞTINÊ

 

Piştre jî li ber bariyeran çalakiya rûniştinê hat li darxistin. Piştî çalakiyê, ber bi qada nobetê ve bi dirûşma “Qeyûm dê biçin em ê bên” meş hat lidarxistin.