ŞIRNEX – Qeymeqamê Hezexê, têkildarî polîs Mehmet Kîraz ê ku bi wesayîta zirxî li zarokekî 7 salî xistibû û kuştibû, îda kir ku “bêyî lêqelibandinê alternatîfa wî nebû” û destûra lêpirsînê neda. 

 

Li taxa Turgut Ozal a girêdayî navçeya Hezex a Şirnexê, di 3’yê Îlona 2021’an de polîs Metîn Kîraz, bi wesayîta zirxî li zarokekî 7 salî Mîraç Mîroglu xist û bû sedema mirina wî. Mîrogluyê ku bi giranî birîndar bûbû, li nexweşxaneyê jiyana xwe ji dest da. Piştî bûyerê der heqê Kîraz de ji ber sûcê “bi texsîr bûye sedemê mirinê” li Dadgeha Giştî ya Hezexê doz hatibû vekirin û Kîraz di dozê de beraet kiribû. Lêbelê daraza ku bêyî destûra rayedarên îdarî yên herêma bûyerê hatibû kirin, ji aliyê Dadgeha Edliyeya Herêmê a Amedê ve biryar hate xirakirin. 

 

Piştî 2 alan Wezareta Karên Hûndir û Qeymeqamtiya Hezexê bersiva destûra lêpirsînê da. Qeymeqamê Hezexê Anil Adiguzel, der heqê polîs Kîraz ê ku bûbû sedemê mirina Mîraç Mîroglu, rapora komîserekî erkdar ê li Miduriyeta Hezexê esas girt û destûra lêpirsînê neda. Di biryarê de hate diyarkirin ku divê Mîraç Mîroglu dema bûyerê de ne li ser rê bûya. Di biryarê de cih da rapora Lijneya Pisporên Daîreya ÎhtisasaTrafîkê ya Edlî Tiba Stenbolê. Herwiha di raporê de hate destnîşan kirin ku ajokarê wesayîta zirxî polîs “bêyî qisûr e, Mîraç bi qisûr e” û ev rapor bû sedemê nedana destûra lêpirsînê. 

 

‘TU ALTERNATÎFEKE POLÎS NEBÛ’

 

Qeymeqamtiyê di biryara xwe de bal kişand ser dîmenên kamera û lêkolînên cihê bûyerê û îda kir ku leza wesayîtê bo saetekî 30.1 km e û ev li gorî rêzikên lezê di cih de ye. Hemû dane wek hincet hatin nîşanan û polîs bi vê îdaya “zarok bi duçerxeyê ve li wesayîtê qelibiye tu alternatîfeke polîs nebû” hate parastin.

 

Parêzerên dozê, diyar kirin ku dê li dijî biryara îdarî îtîraz bikin û ji bo edaletê dê serî li hemû dezgehên hiqûqî bidin.

 

MA / Zeynep Durgut