NAVENDA NÛÇEYAN - Di êrîşên Îsraîlê yên li dijî Xezayê de herî kêm 11 Filistînî hatin kuştin û gelek jî birîndar bûn.

 

Di êrîşên Îsraîlê yên li Şerîda Xezayê de herî kêm 11 Fîlîstîniyan jiyana xwe ji dest dan, gelek kes jî birîndar bûn. Li gorî ajansa nûçeyan a fermî ya Fîlîstînê WAFA'yê, balafirên keşfê yên bê mirov ên Îsraîlê (UAV) mala xwarinê ya li Kampa Penaberan a Katatwa ya li rojavayê Xan Yûnisê kir hedef.

 

Di êrîşê de 3 Filistînî hatin kuştin û gelek jî birîndar bûn. Bi heman rengî li navenda bajarê Xan Yûnisê jî bi balafireke bê mirov êrîş li malekê hate kirin û di encamê de kesekî jiyana xwe ji dest da û hevser û zarokê wî jî birîndar bûn.

 

Li kolana Sixkê ya taxa Zeytun a Bajarê Xezayê di encama êrîşa bi topan de jinekê jiyana xwe ji dest da. Di êrîşên hewayî yên artêşa Îsraîlê de 5 Filistînî li navenda bajarê Xeza, bajarê Refah û nuqteyên cuda hatin kuştin.

 

Her wiha ciwanê bi navê Behadîn Raîd Mihrîb ku di êrîşa beriya niha ya li ser bajarokê Nesr ê dikeve bakurê rojhilatê Refahê de birîndar bibû jî jiyana xwe ji dest da.

 

Maleke li taxa Şucayya ya li rojhilatê Xezayê jî ji aliyê balafirên şer ên Îsraîlê ve hate bombekirin. Hat ragihandin ku di êrîşê de mirî û birîndar hene, lê ti hûrgilî nehatin dayîn.

 

Artêşa Îsraîlê piştî agirbesta li Şerîda Gazzeyê ku di 19'ê Çileyê de ket meriyetê, di sibeha 18 'ê Adarê de dest bi êrîşan kir.