NAVENDA NÛÇEYAN - Çalakiyên protestoyî yên li dijî girtina Ekrem Îmamoglû di tevahiya şevê de li gelek bajaran domiyan. Gelek kes hatin binçavkirin û kêliyên polîsan tundî li çalakvanan dikirin derketin holê.
Çalakiyên li dijî binçavkirin û girtina Şaredarê Bajarê Mezin ê Stenbolê Ekrem Îmamoglû hatibûn destpêkirin, şevê din jî di tevahiya şevê de berdewam kirin. Di serî de Stenbol, li gelek bajaran bi deh hezaran kes heta serê sibehê li kolanan bûn. CHP’ê duh li Saraçhaneyê dîsa mitîng li dar xist. Polîsan bi bombeyên gazê, guleyên plastîk û ava şid êrişî girseyê kirin. Gelek ciwan bi lêdanê hatin binçavkirin. Kêliya ku polîsan tundî li çalakvanan dikirin hatin kişandin.
EDENE
Li Edeneyê bi hezaran kesa daketin qadan. Girseya ku li Bûlwara Turgut Ozal a navçeya Çukurovayê hate gel hev, ber bi Bûlwara Ugur Mumcu ve meş li dar xist. Welatiyên tev li meşê bûn gelek caran dirûşmên “Hikûmet îstîfa”, “Erdogan îstîfa” , “Maf, hiqûq, edalet” û “Em ê bi yekbûnê bi ser kevin” berz kirin.
Piştî meşê, komê xwest li ser Bûlwara Turgut Ozal û Cadeya Barajyoluyê bimeşe lê polîsan bi ava şid, guleyên plastîk û bombeyên gazê êriş kirin. Di êrişan de gelek kes bi lêdanê hatin binçavkirin.
ENQERE
Girtina Îmamoglû li Enqereyê jî hate protestokirin. Komeke ku li Guvenpark a Kizilayê hate gel hev, dirûşm berz kir û pankart û dovîz hilgirtin. Komê xwest ber bi Bûlwara Ataturkê ve bimeşe û polîsan êriş bir ser. Polîsan têketina Cadeya Meşrutiyetê dorpêç kirin û bi gazên îsotê û ava şid êriş bir ser girseyê. Di êrişê de gelek kes bi lêdanê hatin binçavkirin.
RÎZE
Komeke qelebalix li pêşiya Serokatiya CHP’a Rîzeyê ya li ser Cadeya Cumhuriyetê kom bû û ber bi Cadeya Ataturkê ve meşiya. Meş, li Navenda Çandê ya Îsmaîl Kahraman bi dawî bû.
BURSA
Koma ku li Baxçeyê Milet a li Bursayêkom bû, xwest meşê li dar bixe lê rastî êrişa polîsan hat. Gelek kes bi lêdanê hatin binçavkirin. Serokê CHP’a Bursayê Nîhat Yeşîltaş birîndar bû.
ANTALYA
Şevê din li Antalyayê çalakî hat lidarxistin. Girseya ku bi pêşengtiya Hêzên Ked û Demokrasiyê li Meydana Cumhuriyetê hate gel hev, li vir dest bi meşa protestoyî kir. Koma ku hate pêşiya kampusa Zanîngeha Akdenîz, li vir rastî êrişa polîsan hat. Çalakvanan jî bi fîşekên hewayî bersiv dan êrişa polîsan.
Li gelek bajaran bi hezaran kesan di tevahiya şevê de çalakî li dar xistin.