WAN - Welatiyên Wanê têkildarî bandora polîtîkayên şer a li krîza aborî axivîn û diyar kirin ku heta budçeya şer ji bo aboriyê neyê veqetandin û xerckirin dê ev krîz bidome.
Polîtîkayên aboriyê yên desthilatdariya AKP-MHP’ê li bakurê Kurdistanê û Tirkiyeyê gel xistiye nav rewşekî bêzar û zehmet. Hatiye wê astê ku gel nikare debara xwe bike û ji polîtîkayên aboriyê aciz in.
Li bajarê Wanê ku li gorî îstatîstîkên herî dawî bajarê herî xizan e, gel nikare jiyana xwe ya rojane bidomîne û xelk li dijî vê yekê bi bertek e. Welatiyên ku ji ajansa me re axivîn sedema vê xizaniyê anîn ziman û destnîşan kirin ku polîtîkayên şer bi dawî bibin, dê aboriya welat jî rehet bibe.
‘ÇARESERÎ DI ŞER DE NÎN E’
Fadil Bariştiran anî ziman ku ev demeke dirêj e li Tirkiyê rewşa aboriyê xerab e. Bariştiran da zanîn ku bingeha krîza aboriyê ew ku şerê li dijî kurdan tê meşandin e û got ku çareseriya yekemîn rawestandina şer e. Bariştiran diyar kir ku ji bo çareseriyê divê aloziyên heyî ji holê rabin û wiha got: “Li aliyekî dibêjin bila birêz Ocalan biaxive, li aliyekî jî êrişî Başûr û Rojava dikin. Çareserî bi şer nabe. Em aştiyeke bi rûmet dixwazin. Ew aştî jî bêguman dê bi destê birêz Ocalan bê pêkanîn.”
‘ABORIYA TIRKIYEYÊ DI DESTÊ ÇETEYAN DE YE’
Mehmet Çalçinar jî anî ziman ku divê ku krîza aboriyê zêdetir nebe û xwest ev krîz bê çareserkirin. Çalçinar diyar kir ku hemû welatî bêkar in û ji ber krîza aboriyê nikarin nanekî bibin mala xwe. Çalçinar wiha got: “Hemû aboriya Tirkiyeyê di destên çeteyan de ye. Heya ku ev yek neyê çareserkirin em nikarin bibêjin aştî dê pêk were û krîza aborî bi dawî bibe.”
‘BOMBEBARANKIRIN KUŞTINÊ Û FEQÎRIYÊ TÎNE’
Servet Aydin jî diyar kir ku ji ber krîza aboriyê ew nikarin debara xwe bikin û wiha got: “Êdî rewş weke demên berê nîn e û xerabtir dibe. Ji ber wê rewşa aboriyê gelek kes întîhar dikin. Sedema vê krîza aboriyê şerê heyî ye. Di dema pêvajoya aştiyê de rewşa aboriyê pir baş bû. Niha jî şerekî dijwar heye û her roj mirov tên kuştin. Vaye dîsa rojavayê Kurdistanê bombebaran dikin û gelek mirov û bi taybetî jî zarok tên kuştin. Ev budçeya ji bo şer tê veqetandin, bila ji bo debara gel bê xerckirin. Gotinên Bahçelî û Erdogan ên li ser aştiyê jî ne ji dil in.”
‘DAXUYANIYÊN LI SER ABORIYÊ NE RAST IN’
Eset Eren bi bîr xist ku ji ber aboriyê jiyana wan roj bi roj dijwar dibe û hatiye wê rewşê ku êdî ew nikarin debara xwe bikin. Eren bi lêv kir ku her roj her tişt biha dibe û tiştên îro bi deh lîreyî sibê zêdetir dibe. Eren da zanîn ku daxuyaniyên desthilatdariyê yên li ser aboriyê ne rast in û tişta heyî û daxuyaniyên tên dayîn berovajî hev in.
‘BILA ÊDÎ AŞTÎ BÊ’
Naîme Guneş jî axivî û wiha got: “Debara me li ser sewalkariyê ye. Em dîsa debara xwe dikin, lê mixabin ji ber krîza aboriyê jiyan pir dijwar bûye. Kesên di kirê rûdinên hene û ji ber krîza aboriyê nikarin debara xwe bikin. Em dixwazên ev pirsgirêk çareser bibin. Bila êdî aştî bê.”