Danişîna Doza Kobanê ya li Kampûsa Girtîgeha Sîncanê didome. Di danişînê de navbera hate dayîn û Hevberdevkê Partiya Çepên Kesk Îbrahîm Akin li pêşiya eywana danişînê daxuyaniyê dide. Parlamenterên Partiya Çepên Kesk û gelek kesên din jî tev li daxuyaniyê bûn. 

 

‘SIYASETA DIJMINATIYÊ’ 

 

Akin, Doza Kobanê weke “doza kompasa siyasî” pênase kir û êrişên li dijî Kobanê û berxwedana wê demê bi bîr xist. Akin, got ku wê demê li gel HDP û Neteweyên Yekbûyî (NY), gelek saziyên din ên navneteweyî bangawaziyên piştevaniyê kirin û wiha got: “Hiqûqa navneteweyî got ku ev daxuyaniyên hatine dayîn, fikrên demokratîk in. Ev doza niha tê lidarxistin, dozeke derqanûnî û derhiqûqî ye. Bi temamî encama siyaseta dijminatiyê ya rejîma qesrê ye. Hevalên me îro careke din gotin ku bi awayekî neheq û derhiqûqî tên ragirtin.” 

 

‘REJÎMA OTORÎTER TÊ DARIZANDIN’

 

Bi domdarî Akin anî ziman ku şandeya dadgehê ji bo pêvajoya darizandinê biqedîne nahêle hevalên wan parastina xwe jî bikin û wiha bi dawî kir: “Di esasê xwe de hevalên me nayên darizandin, hevalên me vê darizandina derhiqûqî didarizînin. Anku rejîma qesrê û vê rejîma otorîter û faşîst didarizînin. Careke din nîşan dan bê ka çiqas bêbingeh, bêdelîl û derhiqûqî ye. Ev doz 6 sal piştre ji bo girtina HDP’ê hate vekirin. Hevalên me ev nêzî 3 sal in girtî ne. Dirêjkirina vê rewşê dê bike ku Tirkiye bêhtir teşhîr bibe. Em ê li ber xwe bidin, li heqê xwe bigerin û ji bo pêkanîna edaletê têkoşîna xwe bidomînin. Weke Partiya Çepên Kesk em li gel vê têkoşînê ne.”