BEDLÎS - Gundê girêdayî navçeya Xîzanê 26 roj in di bin dorpêçê de ne û herêm bi dijwarî tê bombekirin. Li gundê Hûzeranê kesê hate diyarkirin ku HPG’î ye û gova ku bi birîndarî xwe spartiyê banga “teslîm bibe” qebûl nekiriye, jiyana xwe ji dest daye. 

 

Li gundên Hûzeran, Akûnis, Govan, Lanîlan, Xûlepûr, Kekulan, Sûreh, Pertawan, Kûran û Mezra Pisyan ên girêdayî navçeya Xîzan a Bedlisê di 2’yê tîrmehê de qedexeya derketina derve hate îlankirin. Piştî qedexeyê bi tevlibûna bi hezaran leşker û cerdevanan operasyonek hate destpêkirin. Biryara qedexeyê di 6’ê tîrmehê de hate bidawîkirin lê operasyonê berdewam kir. Dema operasyon berdewam dikir, herêmeke berfireh a gundên Xûlepûr û Kekulan digire nava xwe vê carê di 14’ê tîrmehê de weke “Herêma Ewlehiya Taybet” hate îlankirin. Walîtiyê di daxuyaniya xwe de diyar kir ku qedexe dê heta 28’ê tîrmehê (îro) berdewam bike. 

 

TIŞTÊN LI HERÊMÊ DIQEWIMIN

 

Di dema operasyonên piştî qedexeya derketina derve hatin destpêkirin de welatî hatin astengkirin ku ji malên xwe derkevin. Sewal bi rojan di govan de birçî hatin sekinandin û destûr nehate dayîn ku berhemên çandiniyê bên komkirin. Çoltera gundên Xûlepûr û Kekulan ên operasyon lê berfireh bû bi rojan bi dijwarî hate bombekirin. Di vê navberê de kamerayên MOBESE’yê û fotokapan li gundan û derdorên wan hatin bicihkirin. Ji ber bombeyên li herêma operasyonê hatin avêtin bi sedan dar şewitîn û bi maşîneyên kar ên leşkeran bi xwe re biribûn jî zirareke mezin dan xwezayê. Bi sedan dar li qadên daristanê birîn û rê çêkirin. 

 

ŞER Û PEVÇÛNÊN DIJWAR

 

Di dema talankirina ekolojîk û mexdûriyeta mezin a gundiyan jiyan de şer û pevçûnên dijwar rû dan. Bi taybetî piştî biryara “Herêma Ewlehiya Taybet” pevçûn dijwar bûn. Pevçûnên herî dijwar di navbera dîrokên 26-27’ê tîrmehê li herêma di navbera gundên Sûreh û Hûzeran rû dan. Herêm bi helîkopter û Balafirên Biçek û Bêmirov (SÎHA) bi dijwarî hate bombekirin. Hate diyarkirin ku di pevçûnan de leşkerek birîndar bûye. 

 

TESLÎM NEBÛ

 

Bombebarana li herêmên çoltar didome. Di 27’ê tîrmehê de goveke li gundê Hûzeranê hate dorpêçkirin. Di vê navberê de derdora gund bi temamî hate dorpêçkirin. Di vê navberê de derdora gund bi temamî hate dorpêçkirin, ketin û derketin hate qedexekirin û derketina welatiyan a paceyan jî hate astengkirin. Dema dorpêç berdewam dikir, Malbata Ozcan a sala par bi hewldanên miduriyeta polîsan anîbûn ber avahiya Partiya Demokratîk a Gelan (HDP) a Mûşê jî anîn gund. Hate îdiakirin ku kesên tê diyarkirin endamê HPG’ê ye û piştî birîndar bûyî xwe spartiye govê, ji malbata Ozcan e. 

 

Ji aliyê malbatê û leşkeran ve demekê banga “teslîm bibe” hate kirin. Hate zanîn ku kesê tê diyarkirin endamê HPG’ê ye bi dengekî bilind gotiye teslîm nabe. Hate diyarkirin ku di vê kêliyê de li govê dengê teqînekê hat û piştî teqînê di paceyan de bombe avêtine govê û gov hatiye gulebarankirin. 

 

Di govê de cenazeyê kesê tê diyarkirin endamê HPG’ê ye hate dîtin. Cenazeyê kesê navê wî nehate zanîn bi ambûlansa anîbûn gund birin. 

 

GUND HÊJ DI BIN DORPÊÇÊ DE YE

 

Ji ber teqînan dîwarên gelek xaniyên li gund derizîn. Hin dîwarên malan jî hilweşiyan. Hêj jî ketin û derketina gund qedexeye û li hemû noxteyên gund bi sedan leşker û cerdevan tên sekinandin.