
Şaredariya AKP’î ji bo îhaleyên ‘nelirê’ hincet kir ‘ewlehî’! 

2025-06-27 10:32:13


	MÊRDÎN - Şaredariya AKP’î ya Stewrê ji roja dest bi kar kirî heta niha tevî hişyariya derhiqûqtiyê ya Dîwana Çavdêriya Darayî jî 5 îhaleyên bihayê wan 77 milyon TL digire, bi îdiaya “ewlehiyê” û bi rêbaza “bazariyê” kir.&nbsp;

	&nbsp;

	Şaredariya Stewrê ya Mêrdînê di Hilbijartinên 31’ê Adara 2024’an de bi rêya “hilbijêrên hatin veguhestin” derbasî AKP’ê bû. Derket holê ku rêveberiya AKP’î gelek karên nelirê kiriye.&nbsp;

	&nbsp;

	Şaredarê Stewrê Engîn Ugur Hamîdî yê AKP’î ye û ji Adara 2024’an heta niha 5 îhale bi rêbaza “bazariyê” ya di çarçoveya Xala 21-C a Qanûna Îhaleyên Cemaweriyê (KÎK) de, kir. Şaredariyê, ji bo rêbaza “bazariyê”, xala 21-C’ê (di dema rewşên taybet ên weke parastin û ewlehiyê de divê îhale tavilê bên kirin) weke hincet nîşan da. Şaredariyê, hişyariya Dîwana Çavdêriya Darayî ya têkildarî Xala 21-C’yê jî paşguh kir. Balkêş e ku di dosyayê de nehate destnîşankirin ka li navçeyê “gefeke ewlehiyê” ya çawa heye.&nbsp;

	&nbsp;

	KARÊ BI BIHAYÊ 77 MOLYON LÎREYAN BI ‘RÊBAZA BAZARIYÊ’ KIR&nbsp;

	&nbsp;

	Du îhaleyên şaredariyê têkildarî parke û bordurê de hatin kirin û yên din jî têkildarî înşaeta hewza avjeniyê, sererastkirina hawirdorê û nûkirina gaza xwezayî bûn. Bi vê yekê re karê ku bihayê wan 77 milyon TL digire, bi hinceta “ewlehiyê” bi rêbaza “bazariyê” hatin kirin.&nbsp;

	&nbsp;

	ÎHALEYÊN BI MILYON LÎREYAN&nbsp;

	&nbsp;

	Li gorî agahiyên li ber dest; “Karê parke û bordurê” di 24’ê Gulana 2024’an de bi bedela 6 milyon û 989 hezar lîreyan da Ercan Înşaetê; “Karê Çêkirina Hewza Avjeniyê” di 5’ê Tîrmeha 2024’an de bi bedela 37 milyon û 850 hezar TL’an da Servet Gumuş; “Karê Sererastkirina Hawirdorê” di 21’ê Tebaxa 2024’an de bi bihayê 11 milyon û 400 hezar TL’an da Abdulkadîr Aslan; “Karê Kevirên Parke û Bordurê” di 31’ê Çileya 2025’an de bi bihayê 17 milyon û 598 hezar û 842 TL’an da Ercan Înşaetê û “Karê Nûkirina Gaza Xwezayî” jî di 31’ê Çileyê de bi bihayê 3 milyon û 534 hezar û 608 TL’an da Mehmet Remzî Alpar.&nbsp;

	&nbsp;

	MIDÛRÊ KARÊN FENÊ ÎSTÎFA KIR

	&nbsp;

	Hat zanîn ku Şaredariya AKP’î dixwaze çendek îhaleyên din jî bide û ji ber rêvebirina karûbarên îhaleyê, di navbera Şaredar Engîn Ugur Hamîdî û Midûrê Karên Fenê Gurkan Demîr de nîqaş derket.&nbsp;

	&nbsp;

	Sedema van nîqaşan, heta Qeymeqamtiya Stewrê jî diçe. Lêbelê derket holê ku erêkirina hinceta “ewlehiyê” ya îhaleyan ji hêla qeymeqamtiyê ve hatiye kirin û qeymeqamtiyê gotiye “cîbicîkirina Xala 21-C’yê guncav e.” Li ser vê yekê, Midûrê Karên Fenê Gurkan Demîr jî îstîfaya xwe da û çû. Lêbelê hêj bersiva daxwaznameya îstîfayê ya Demîr nehatiye dayin û hemû peywirên wî jê hatine girtin û bi vî awayî midûrtiya xwe didomîne.&nbsp;

	&nbsp;

	Hat zanîn ku derdora şaredar Hamîdî jî dibêje ku Demîr li gorî daxwaza wan naxebite û dê karê wî were bidawîkirin.&nbsp;

	&nbsp;

	‘BI AWAYEKÎ DOMDAR BIKARANÎNA 21-C’YÊ LI DIJÎ QANÛNA ÎHALEYANE’&nbsp;

	&nbsp;

	Dîwana Çavdêriya Darayî; di gelek raporên xwe yên berê de têkildarî xalên 21-B, 21-C û 21-F ên Qanûna Îhaleyên Cemaweriyê ku rêbaza “usûla bazariyê” di xwe de dihewînin, hişyarî kir. Di raporan de hate gotin ku kirina îhaleyan a bi hincetên behsa xeberê divê di “rewşên îstîsnaî” de be. Di raporê de tê gotin ku xala 21-C’ê tenê dikare di rewşên awarte bê bikaranîn, divê gefa ewlehiyê şênber be û bi awayekî domdar bikaranîna vê xalê jî binpêkirina rêgeza şefafî, reqabet û hesabdayînê ye. Di vê çarçoveyê de jî Dîwana Çavdêriya Darayî vê rewşê weke derqanûnî dinirxîne.&nbsp;

	&nbsp;

	MA / Ahmet Kanbal

	&nbsp;

	&nbsp;

	&nbsp;